الرئيسيةالرئيسية  البوابةالبوابة  اليوميةاليومية  مكتبة الصورمكتبة الصور  س .و .جس .و .ج  بحـثبحـث  التسجيلالتسجيل  دخولدخول  
http://she3r.alafdal.net/h1-page

شاطر | 
 

 اتوضا من قبل الكتابة واسمي

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
Areej
المديره
المديره
avatar

انثى
عدد المساهمات : 382
العمر : 27
الموقع : فلسطين
نقاط : 3580
تاريخ التسجيل : 06/01/2009

مُساهمةموضوع: اتوضا من قبل الكتابة واسمي   الثلاثاء يونيو 14, 2011 6:24 pm

اتوضا من قبل الكتابة واسمي
واكتب قصيدة عن ابويا وامي
والشعر خايف يمتحن كالعادة
واقف بلبس المدرسة من بدري
ما تقولش في اول صراط يوم القيامة
بقولو يجري
يحرن على باب القصايد مهري
رضوى ومريد حرم القصايد ليها هيبة دخلتو
مريم وفي ايديها الوليد الشامي ثم المصري
والشعر في مشهد ميلادي نخلتو خايفة وحوش الانس ابويا ونظرتو مستأنسة بنظرة عيون أمي الوحوش
غزلان على نبع الهوى ورادة
وعليها قانون الزمن ما يسري
يا نسمة مرت في محل حدادة
يا مدح ابويا وامي مر في صدري
تشفي الحديد من نار لكن ما تبردوش
لأجل الحديد الحر يفضل محمي
اتوضا من قبل الكتابة واسمي
وابويا قال للشعر يجري ورايا
ف جري وعملي كمين في كل مراية
فيهم اشوف رضوى ومريد راسميني اجمل من اللازم ومن الممكن
وابص في مرايتي اقول يمكن
انا طير ما اشوف في مرايتي الا سمايا
البوم صور فيها خصل ملوية وعيون سود
صوري الجميلة في طفولتي وعود
في شيب رموشي يفضلو لازميني
ده لقب بشر مش بالولادة بيحرزو المولود
لولا رضوى موجودة ومريد موجود
لولا كرم اهل الكرم والجود
ما كنت انادي الله بصوت ممدود
يا رب انتا ابقى اهلي لاسمي
اتوضا من قبل الكتابة واسمي
رضوى امتحان الشعر وشهادتو الكبيرة
معناها محراب المعاني
دقق تلاقي السر في شغل القيشاني
في كل وحدة زخرفة قصة مدينة واهلها وحروف نبات عالحيط يفرع اصلها
تلقى ولاد بينطوا ما بين المباني
والدمع متأجل في عين الجدة تغزل غزلها
وجمل ما يسأل عالمسافة
وغمام بيرسم عالحصيرة صور لبغداد الخلافة
ومغول عينيهم عالحصيرة وغيطان تقول للصحرا قومي دا مكاني
ومؤذن الاقصى قالولو القدس صارت مالطة اذن تاني
رضوى امتحان الشعر وشهادتو الكبيرة
معناها محراب المعاني
الناس بتصبر ع الولادة تسع شهور وانا امي تصبر عالزمان زمانين كمان علشان مريد وعشاني
قالولها ما تخترش ف اختارت
على سنة الهي وشرعتو سارت
وجاروا عليها ما جارت ولا هاودت ولا جارت
وصارت قبل ما تحملني تحمل همي
اتوضا من قبل الكتابة واسمي
يا ريتني يابا الجمرة بتدفي في دير غسانة بوتك بيها
يا ريتني شايل شنطتك وانتا في طريق المدرسة
يا ريتني حارس شقتك في القاهرة يوم خمسة يونيو المغربية
يا ريتني في بيروت قميص واقي
يا ريتني في منفى بلاد البرد حبة تين
يا ريتني_ بس انا عارف اني دي صعبة حبة_ أخوك
يا ريتني كنت جواز سفر بين كل سطر وسطر
شعرك اعادة خلق للعالم
بتوزع الاسماء على اشياء فتحييها
شارب قوي صنعة ابوك ادم
يا ريتني شارب صنعتي زيك
علمني يا بابا الوزن
صفق بإيدك يا ولد
اسهلهن الوافر: مفاعلتن مفاعلتن فعولن
يلا اسبح والبحر قدامك امشي وراك وماسك فيك
واجري وراك على حصاني فيسبقني البراق تحتيك
تقولي شد خلي المهر يتجنح
أشد عليه وعيني عليك
في باطن كفي حاسس بالعرق يرشح
ونفسي اسبقك مرة عشان ارضيك
ايدك في ايدي يا ولد
على فين يا بابا؟ مروحين
زغاريد تخلي الوحي يطلع للسما من الارض
أسرينا لدير غسانة ورجعنا بسنة وفرض
قلت الارض دي بتاعتك هدية ومسؤولية وعرض
كملت حروف اسمي ونبرة صوتي والمشية ونظرات العينيين
حطينا طلقتنا في بيت النار وقلنا يا معين
ايدك يا سيدي حقها تنباس وانا مريد ليكم يا سيدي مريد
فلاح وتجدر مهجتك بالايد
يطعم رغيفك امتك ويزيد
صياد وترمي بالشباك الناس
تدعو الى يوم القيامة اليومي
اتوضا من قبل الكتابة واسمي
الدنيا دي ورق امتحان ابيض
علينا نحط فيها اسئلة واجابة
نكتب عليها بالخطاوي والايدين
وانتو على صحة كلامي شاهدين
زي الكرام الكاتبين
واللي كتبتوا مهوش مديح
المدح لسة ما ابتداش
المدح مش ممكن حيبقى كتابة
المدح دة عيشة تعاش
اللي كتبتو على الجبين كمادة
بردة بتشفي المؤمنين
نسمة ومرت في محل حدادة
يا مدح ابويا وامي مر في صدري
والشعر خايف يمتحن كالعادة
واقف بلبس المدرسة من بدري
ودة كرمكم وعصرت منو خمري
ودة خمركم بس انعصر من كرمي
اتوضا من قبل الكتابة واسمي
واكتب قصيدة عن ابويا وامي
الرجوع الى أعلى الصفحة اذهب الى الأسفل
زهرة الاسلام
مبدع جديد
مبدع جديد


انثى
عدد المساهمات : 7
العمر : 30
الموقع : القاهره
العمل/الترفيه : لا يوجد
نقاط : 2507
تاريخ التسجيل : 14/02/2011

مُساهمةموضوع: رد: اتوضا من قبل الكتابة واسمي   الثلاثاء يونيو 14, 2011 10:29 pm

مجهود رائع مشكوره ونتمنى المزيد
الرجوع الى أعلى الصفحة اذهب الى الأسفل
myrose
مبدع جديد
مبدع جديد


انثى
عدد المساهمات : 4
العمر : 35
الموقع : مصر
العمل/الترفيه : صحافة
نقاط : 2418
تاريخ التسجيل : 07/05/2011

مُساهمةموضوع: رد: اتوضا من قبل الكتابة واسمي   الأربعاء يونيو 29, 2011 9:22 pm

اكتب قصيدة عن والدك ووالدتك ، قصتهم تتسجل للتاريخ مش علشان قصة حبهم ، علشان قصة ولدهم اللى لوحدة قصة وحكاية ، ربنا يبارك فيك ، ياريت كل ام تعرف تربى ولد زيك ، يا سلام لو ف كل مجال تميم ، كانت تبقى مصر اجمل بكثير.
الرجوع الى أعلى الصفحة اذهب الى الأسفل
 
اتوضا من قبل الكتابة واسمي
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
 :: تميم البرغوثي :: قصائد تميم البرغوثي-
انتقل الى: